El lavatoi aleva chela funtana faia quasi semper de sas

granii, quarciada cun travit, listei e de sora piod o cop.

Tanti lavatoi i gheva l’acqua surgiva e ialt i gheva

chela de l’acquedot cun i rubinit. Agheneva in tut

i paes dela nostra val, e a Port che me ricordi aieva tri.

Quand aleva bel, tanti don oltre al lavatoi i nava

ai lac a lavà cun el brelin, chel as a posta che i don

i stava in genugiun a lavaa. In di lavatoi i don i nava

anca se el piuveva cun i so curbel caric de pagn sporc

e la sudela del’acqua sbruienta. Tanti de lor i lavava

anca i pagn di alt magari sciori, per ciapà un quaicos.

In di lavatoi i don intant che i lavava i faseva un

gran ganasà e inscì a vegniva fò de tut e de tuc, e

ogni tant capitava chi se ciapava pei cavei e poo a

vulava anca un quai sganasun. I don a secunda de

in dua i stava de cà i nava in de chel pusè comut e

tanti volt agheva mia el post liber e i se meteva in

cua a specià. Ma i temp poo aiè cambiaa, ià metù

l’acqua in cà, el bagn e i lavatris ià ciapà el post di

lavatoi, anca se chi rop lì mudern ogni tant aiè a toc.

Inscì i lavatoi aiè restalì a fa nagota. Quant fregà

ià fai cui man e spazeta su chi sas granii e poo via

cun la sua curbela piena de pagn sturgiù per na a

stendi. Chest aleva chel che i faseva per lavà i don

d’una volta, chel aleva el lavatoi.