Quand a sevi un fioo, stavum de cà fora del paes, fasevum

i guardian in una vila de sciori. La nona Carulò la

viveva per cunt sò e guai a parlaghen de stà fora,

inscì quan la vegniva in de num la truvava mai tera

ferma e la gheva semper presa de turnà indrè a cà

sua visin al campanin dela gesa. Lee la me diseva

che in paes quand el piuveva gheva mia bisogn

del’umbrela perchè te pudevet viagià semper sota

i grund di tec. Ades ogni tant a me vegn in ment i

rop de fioo e inscì un dì u vurù faa un gir a pè sota

l’acqua indi strà che la faseva lee. Dala cà di cucagna

su in piazeta, sum vegnì giò vers la piaza dela gesa,

poo in la per via Roma fina ai cà ros, poo su per

la via castel fina ai cantun sciatel, e ala fin giò un’altra

volta in piazeta fin indua sum partì. Geent ! rispet

a na volta quanti rop aghè cambiaa. Prima de tut

i cà ades aiè tuc saraa, a se veet pù de pagn stendù

sui teraz, a pè se incuntra nisun, te vedet pù gnanca

de fioo che i giuga a scundes, cui serc o cun la lipa,

e inscì se sent pù ei tic tac di zocur e zocurun in sula

sarisciada, chela che gheva ilà quarciada cul catram

e del sarisc pù gnanca l’umbra. Certi cà i gà i grund

cui canai rot, e se te stee mia atent te fee la docia

bela vestii. Te sentet pù i colp de martel del Vincenz

e del Ceser bagat che i picava el curam su chela bocia

negra per fal vegnii dur, prima de cusil cul spac sporc

de pesa ai scarp rot e cunsumad che lor ià tirava come

nov. Aghè pù gnanca la Togna che la carpiva la lana

sota el portic de cà sua cul purtun vert inscì quand

pasava quaidun i se fermava a tapelaa. Te vedet pù

gnanca de agun tacasù a secaa dopo la salamoia.

Ades in strada invece dei don cui zocur de legn cui

patel de pel e la stringa in mez, e al brasc la borsa

de tela per la spesa, te trovet i utumobil che i tegn

tuta la strada, e inscì in pù a chela de sora dei grund

rot te ciapet anca chela de sota. Chisà? forse l’è depertut

inscì come chi, anca in di alt paes cume el nost, aghè

pù la Carulò, la Neta o la Teresa che quand el piuveva

i nava in gir per i strà del paes senza umbrela.