A pensac ben la nostra val intorn al
votcent la duveva ves
istaia quasi tuta buschiva, chesto
mia perchè abia
legiù la storia vegia di nost paes,
anca perchè per
leg a sum propri mia taià. Però aghi
de savee che
a giraa in lung e in larg la
muntagna, a se trova depertut
di mur de sas inscì cume se dis a
sec, per tegnì su
la tera cun sora di ripian, o anca
pusè che tut di pign
de boc e bucioni lung anca di centen
de meter che
tanti volt aiè fai sui cunfit tra
una proprietà e n’alta.
Tuc chi sas lì trai là, e poo
impignaa vun sora chelalt,
i gros de sota i picul de sora in
manera chi tegniva
poc post, aiè stai metu là dai
noster vec, tirandui
fò dala tera insema a sciuc e radis.
A na quai manera
chesto aleva un lavor che i faseva
un po tuc ai tempi
che fù, ma agheva di gent che per
necesità, cun forza
e bravura nel dupraa el sapun aieva
mei di alt, e inscì
ian ciamaa cul soranom i cavandun.
Chesta lè un
poo la storia dei Sobrero che in del
votcentquaranta
o lì a dree aiè vegnù dala Spagna in
cerca de furtuna,
o forse per salvaa la pel. Da Genuva
indua el nono
el faseva un poo de capisquadra a
scavaa galerì e
fundament di muraioni de sustegn per
faa pasaa i
prim treni, l’è poo finii per met su
cà nela nostra
val, e propri a Sarig indua gheva
tan bisogn de chel
lavor de fadiga, chesto anca perchè
a chi tempi là
se viveva dumà de chel che se tirava
fò dala tera,
e alè inscì che i bosc a furia de
sapunaa i diventava
praa e càmp de patati. Aieva anca i
temp che la gent
la nava a too l’acqua in di riaa che
i viagiava semper
visin ai paes, e l’acqua la cureva
incanalada sui piod de
fianc ala sarisciada di strà semper
neta e fresca. Ades
quand a viagi in di bosc e trovi
pianei, mur a sec
e boc metù là in bela manera e dumà
cun la forza
di brasc e tut intorn invece de camp
de patati e praa
aghè bosc e bosciur a me fermi, a
guardi in gir intant
el cervel el lavora. Dopo un poo
sbasi la testa e cul
grop che intant a me vegnù, tiri sù
e vò via. Chesta
alè un riga de storia dela nostra
val scrita sula tera
cun sudor e fadiga. Alè la storia
dei Sobrero i cavandun
de Sarig.